1
Semomon kiti boi bejanji,
Embunda’ Tuhan ngakun naksi’;
Teko mejunya antap ngelanji,
Dokon selegundi’ bekat tangsi’.
2
Zaman Alastu kiti dembua’,
Bia’ nampung momon meterua’;
Endiam betong temboro’ embua’,
Ngakun nanggup baru no pelua’.
3
Kiti lupo Pejanjian Asali,
Teko mejunya gangau bebeli;
Lupo ngabdi Tuhan `Aali,
Utang betumpuk nia’ tepali.
4
Dongsab kam kaang bedawa,
Nuut tomod masa benyawa;
Walhal Kitab taan nyerua,
Metarang kisah masa arwah.
5
Nia’ tenerimo dawa lupo,
Pasal Nabi boi no meteko;
Kitab tafsir antap no iko,
Alap bana buat pesoko.
6
Mitu mejunya melua’ kelelagan,
Belo’-belo’ makhluk bantugan;
Nikmat kurnia buat ni lembugan,
Lupo amanat khalifah Tuhan.
7
Limo waktu da kiti gupu,
lua juhur sampai subu;
Nyaun kiti diam junya tu,
Kehendak Allah no kiti pitu.
8
Tingotnu Adam penejaji Khalifah,
Bangan malaikat nampung manta;
Lapas seduga’ ngakun kala,
Tunduk sujud nuut Perinta.
9
Senerita’ kisah awal zaman,
Iblis laknat ngiman Tuhan;
Tapi takbur manta Arahan,
Ahli neraka sabit ukuman.
10
Silap Iblis bila telanjur,
Jarun no momon jaji bubur;
Walhal Allah sifat-Ni al-Ghafur,
Ngampun Adam nadar piundur.
11
Endiam diri petuut pan napsu,
Itu no selalu moo lusu;
Enjata’ akal bersi kalbu;
Diri rohani niaun gupu.
12
Endomon Iblis santak kiamat,
Syaitan nasat setiap saat;
Napsu pekua’ nelang raat,
Asal nyejegoon tatap selamat.
13
Keluman manusia memang seruat,
Endiam meluar iko nasat;
Janji ar-Rahim amun ti taat,
Selamat dunia selamat akhirat.
